Уханиас ирсэн оюутнуудыг өнөөдөр коронавирусийн хоёр дахь шинжилгээнд оруулна

Монгол Улсад өчигдрийн 22.00 цагийн байдлаар коронавирусийн халдвар бүртгэгдээгүй. Коронавирусийн халдвараар сэжиглэгдэн шинжилгээнд хамрагдаж, сөрөг гарсан 60 гаруй хүн бий хэмээн ЭМЯ-наас мэдээллээ.

Шинэ коронавирусийн дэгдэлтийн улмаас БНХАУ-ын Ухань хотод хорио цээрийн дэглэмд ороод байсан 31 иргэнийг хоёрдугаар сарын 1-ний өдөр авчирч, ХӨСҮТ-д тусгаарласан. 30 оюутан, нэг бага насны хүүхдэд хийсэн эхний шинжилгээний хариу сөрөг гарсан.

Оюутнуудыг 14 хоног тусгаарлаж, эмчийн үзлэг хийж, хяналтад байлгаж байна. Хоёр дахь шинжилгээнд өнөөдөр оруулна, оюутнуудын бие хэвийн сайн байгаа гэж ХӨСҮТ-ийн Тандалт судалгааны албаны дарга А.Амбасэлмаа мэдээлэв. 

Хоёр дахь шинжилгээний хариу сөрөг гарвал оюутнуудыг тусгаарлах 14 хоногийн хугацаа гүйцсэн тул тусгаарлалтаас гаргахаар бид ярилцаж байна гэж ХӨСҮТ-ийн ерөнхий захирал Д.Нямхүү өнөөдөр мэдээллээ.