Ерөнхийлөгчийн тангараг өргөх ёслолд зориулсан парад Д.Сүхбаатарын талбайд болно

Гэрэл зургийг mpa.mn /2018.07.10 Төрийн далбааны өдөр зориулсан парад/

Монгол Улсын Ерөнхийлөгчөөр сонгогдоод буй У.Хүрэлсүх зургаадугаар сарын 25-нд тангараг өргөнө.

Тэгвэл өнөөдрийн УИХ-ын чуулганаар “Монгол Улсын Ерөнхийлөгчийн тангараг өргөх ёслолын журам батлах тухай” тогтоолын төслийг хэлэлцэж шинэчлэн баталлаа. 

Тогтоолын төсөлд Монгол Улсын Ерөнхийлөгчийн тангараг өргөх ёслолд зориулан Д.Сүхбаатарын талбайд Төрийн далбаа мандуулсан байх бөгөөд ёслолыг Төрийн ордны “Их Монгол” танхимд зохион байгуулахаар зохих бэлтгэлийг хангасан байхаар тусгажээ. 

Журамд шинэ сонгогдсон Ерөнхийлөгч гэргий /нөхөр/-ийн хамт Их эзэн Чингис хааны хөшөөнд мэхийн ёслоод Төрийн ёслол хүндэтгэлийн “Өргөө” цогцолборын баруун хаалгаар Төрийн ордны "Их Монгол" танхимд морилно. Үүний дараа Улсын Их Хурлын дарга Улсын Их Хурлын гишүүдийн ирцийг мэдэгдэж Улсын Их Хурлын чуулганы нэгдсэн хуралдааны ажиллагааг нээж “Монгол Улсын Ерөнхийлөгч Монгол Улсын Их Хуралд тангараг өргөнө” хэмээн зарлан мэдэгдэхээр заасан байна.

Тангараг өргөсөн Ерөнхийлөгч Улсын Их Хурал болон ард түмэндээ хандаж индрээс үг хэлнэ. Мөн Ерөнхийлөгчийн тангараг өргөх ёслолд зориулсан цэргийн ёслолын жагсаалыг Д.Сүхбаатарын талбайд явуулахаар тусгагджээ.

Ёслолын жагсаалд хэчнээн алба хаагч оролцох талаар шийдвэр, мэдээлэл гаргаагүй байна

Тус цэргийн ёслолын жагсаалд оролцох цэргийн албан хаагчдын бэлтгэл хангагдсан эсэхийг Зэвсэгт хүчний Жанжин штабаас тодруулахад "Ерөнхийлөгчийн тангараг өргөх ёслолд оролцох цэргийн алба хаагчдын бэлтгэл гэж тусдаа хийгээгүй. Тус ёслолын жагсаалд хэчнээн алба хаагч оролцох талаар шийдвэр, мэдээлэл гаргаагүй байна. 

Ардын хувьсгалын 100 жилийн ой, Монгол Улсын Төрийн далбааны өдрөөр төв талбайд болох Цэргийн ёслолын жагсаалд 37 салбарын 3,200 цэргийн алба хаагч оролцоно. Уг жагсаалын нэгдсэн бэлтгэл энэ сарын 11-ний өдрөөс ирэх сарын 9-ний өдрүүдэд хуваарийн дагуу явагдах юм. Эдгээр албан хаагчдаас тодорхой хэсэг нь Ерөнхийлөгчийн тангараг өргөх ёслолын жагсаалд оролцох болов уу гэж таамаглаж байна" хэмээн хариуллаа. 

ШИНЭ ЖУРМААС:

  • Монгол Улсын Ерөнхийлөгчийн тангараг өргөх ёслолын журмыг шинэчлэн боловсруулахдаа Улсын Их Хурлын Ерөнхий нарийн бичгийн дарга Монгол Улсын Үндсэн хуулийн уг эхийг, Ерөнхийлөгчийн Тамгын газрын дарга Төрийн тамгыг танхимд залж, тангараг өргөх ёслолын дараа буцаан байранд нь залах, Ерөнхийлөгчийн тангараг өргөх ёслолд зориулсан цэргийн жагсаал явуулах заалтыг 2017 онд хүчингүй болгосныг сэргээн Д.Сүхбаатарын талбайд зохион байгуулахаар нарийвчлан тусгажээ.
  • Мөн бүрэн эрх нь дуусгавар болж байгаа Ерөнхийлөгч тулгар төрийн уламжлалт есөн хөлт Их цагаан туганд хүндэтгэн ёсолж, адис авч, Төрийн хүндэт харуул жагсан, холбогдох албан тушаалтнууд үдэн гаргана.
  • Түүнчлэн Улсын Их Хурлын дарга, Ерөнхий сайд бараалхаж баяр хүргэх, мөн гадаадын зочин, төлөөлөгчид Ерөнхийлөгчид бараалхаж баяр хүргэх ёслолыг Төрийн ёслолын газар, Гадаад харилцааны яамны Дипломат ёслолын газар хамтран зохион байгуулна.

 Төрийн далбааны өдөрт зориулсан парадын бэлтгэл

 Төрийн далбааны өдөрт зориулсан парадын бэлтгэл