“Гандантэгчэнлин хийд” орчмыг соёл, аялал жуулчлалын бүс болгоно

“Гандантэгчэнлин хийд” орчмыг соёл, аялал жуулчлалын бүс болгоно

Засгийн газрын өнөөдрийн хуралдаанаар Баянгол дүүргийн 16 дугаар хороо, Гандан орчмыг соёл, аялал жуулчлалын бүс болгон хөгжүүлэх саналыг дэмжиж, техник эдийн засгийн үндэслэл, зураг төслийг боловсруулах үүрэг, чиглэлийг өглөө.

Баянгол дүүргийн 16 дугаар хороо Гандантэгчэнлин хийд орчим нь 55.8 га талбайг хамрах бөгөөд тус хэсэгт 1642 өрхийн 5743 иргэн оршин сууж байна.

Мөн 2538 барилга, байгууламж байрлах бөгөөд 174 аж ахуй нэгж, байгууллага шашны эд зүйлсийн худалдаа, авто машины засвар, үйлчилгээ эрхэлдэг.  Гадаадын жуулчдын хамгийн түрүүнд сонирхдог газруудын нэг бол Гандантэгчилэн хийд юм.

Жанрайсэг дуганыг сонирхож орсон жуулчдын тоо

  • 2015 онд 25.000,
  • 2018 онд 30.000,
  • 2019 онд 32.000 болж, жилээс жилд нэмэгдэж байгаа аж.

Гандантэгчэнлин хийд орчмыг хөгжүүлэх чиглэлээр 400 өрхөөс судалгаа авсан. Судалгаанд хамрагдсан иргэд 2015 онд батлагдсан хэсэгчилсэн ерөнхий төлөвлөгөөг шинэчлэх шаардлагагүй, газар чөлөөлөлтийн үйл ажиллагаанд оролцохгүй буюу өөрсдийн газартаа бүтээн байгуулалт хийх, инженерийн дэд бүтцийн төвлөрсөн шугам сүлжээнд холбогдох саналтай байгаа аж. 

Цаашид “Гандантэгчинлэн хийд” орчмыг соёл, аялал жуулчлалын бүс болгон хөгжүүлэх техник эдийн засгийн үндэслэл, зураг төслийг боловсруулж хэрэгжүүлнэ гэж Нийслэлийн хот байгуулалт, хөгжлийн газраас мэдээллээ.